من وحى مواصلات مصر

فى الميكروباص لو ليك باقى ربع جنيه هتاخده واللى حواليك هيشوفوا ده عادى وحقك ..فى التاكسى لو العداد 5 جنيه لو مدفعتش 6 أو سبت باقى العشرة ممكن أوى تتشتم من السواق أو تسمع تعليق مفاده انك مش وش تاكسيات .. لو مستعجل الميكروباص هيوصلك أسرع لأن التاكسى هيلف بيك الكرة الأرضية عشان العداد يعمل أكتر  والمترو أسرع من الاتنين..لو انتى بنت لازم تعرفى انه هيتم التحرش بيكى بغض النظر عن المواصلة اللى هتركبيها بس الفرق انه لو فى مواصلة عامة هيبقى عندك أمل إنه محاولة التحرش متتحولش لاغتصاب لكن فى تاكسى وطلعتى على الدائرى أو فى شارع مهجور مصيرك هيعتمد على حظك ..الميكروباص وسيلة مثلى للتواصل الانسانى ومعرفة كنه المخلوق المصرىلأنك فى التاكسى بتتعامل مع فرد واحد لكن الميكروباص حواليك على الاقل 12 بنى آدم مشكلين تراقبهم وتحلل كلامهم ولبسهم وتصرفاتهم ..متحاولش تاخد مترو أو أوتوبيس فى الصيف عشان تحلل الناس لأن غالبا انت اللى هتتحلل من الروايح الكريهة اللى هتشمها .. عشان تكتسب مهارات أبطال أفلام الاكشن مش محتاج تدريبات كونج فو وكاراتيه ركوبك الواصلات العامة هيحفز طاقات العدوان كلها بداخلك وهيعلمك مهارات مكانتش أبدا فى خيالك ومنها على سبيل المثال : 1- الركوب والقفز أثناء سير المواصلة ما هو السواق مش هيستنى سعادتك لما تركب أو تنزل المواصلة ماشية فى مسيرتها وانت مش هتعطل عجلة الانتاج ..2- مهارات اللكم وبعض مهارات الجودو ما هو مفيش حاجة اسمها مفيش مكان مش فيه واحد جمبك ؟ ارمى نفسك عليه متخافش مش هيفطس هو متعود على كده ولو كان مكانك كان هيعمل نفس التصرف 3- الالتحام بقوى الشعب العامل ( دى بقى مهارة سياسية ) التحام هيقربك للجماهير بشكل غير مسبوق انت هتبقى فعليا فى أحضان الجماهير حاسس بيها وسامع نبضها  .. فى الميكروباص تحديدًا هتتعلم ازاى تكون مواطن مطيع لأن لو اعترضت على أى حاجة السواق بيعملها هينزلك تحت نفق ..

فوق كوبرى .. فى قلب الصحرا حتى هينزلك وملكش دية وعلى فكرة مفيش حد من الركاب هيقول له تلت التلاته كام ... نرجع للبنات اتعلمى تشتمى لو صوتك رفيه تخنيه ع الآخر..عشان تلحقى كرسى لازم يكون فيه ضحايا حاولى بس ميكونش الضحية طفل أو راجل كبير أو امرأة مقهورة زيك بس أى  male  قدامك هاتيه من قفاه وأى واحد وراكى اديه بالكوع ..كل ما كنتى ست مفترية كل ما كانت فرصك فى النجاة أعلى وكل ما كان موقعك الاستراتيجى فى دولة الميكروباص أو الباص أفضل .. ياه ده المواصلات المصرية دى مصدر إلهام بشكل غير عادى أشوفكم الحلقة الجاية :)