الدم أسوأ وسيلة
وصية / ميادة مدحت
واحنا على أعتاب 6/30/2013 والأجواء ملبدة بغيوم الغضب والناس فاض بيها ، فيه ناس
بيقولوا ان الظروف دلوقتى بتفكرهم بشهر يناير 2011 . وأنا بأقول الظروف مختلفة
واحنا اللى كنا حطب الثورة وشعلتها بقينا جرحى حرب .. افتكروا فى الثورة شهداءها
اللى ماتوا وارتاحوا وافتكروا مصابيها لكنهم نسيوا جرحاها . الشباب اللى مفيش جروح
فى جسمه لكن روحه اتقطعت ألف حته ويقينه راح والشك مسابش قيمة مطالهاش.
احنا اللى آمنا
بالثورة قبلها بسنين احنا اللى مأخدناش لقب شهيد ولا مصاب ولا بقينا نجوم ولا
استرزقنا من موت غيرنا وعملنا فيها منظرين وعملنا ائتلافات وعشنا دور المتحدثين
الرسميين باسم الثورة ومفجريها . مش هادخل فى تفاصيل اللى فات لكن خلينا فى اللى
جاى .. دلوقتى فيه دفع فظيع من طرفى الصراع اخوان ومعارضة فى اتجاه الدم .. فيه
تحريض بغباوة على القتل ومن هنا أحب أقول لنفسى ولكل واحد وواحدة بيتخنقوا فى لحظة
فيحسوا ان اللى قدامنا مينفعش معاهم غير نسيح دمهم .. نادى بالدم والعنف زى ما تحب بس انت
متأكد مش هتقع من طولك لما دم حد من أهل بيتك أو ولادك أو اصحابك يلوث إيدك أو
يسيح قدام عينيك؟ قول إن الثورة مش هتكمل غير لما يكون فيه دم فى كل بيت بس انت
متأكد لو كل بيت داق طعم الدم هتفضل البلد هى هى ؟ البلد أصلا هتكون لسه موجودة؟
قبل ما تقول كلمة احسب حسابها واسأل نفسك انت قدها ولا لأ. الدم أسوأ وسيلة فما
بالك باللى عايزين يخلوه هدف؟
كله إلا
الحرب الأهلية . ورسالتى وأمانتى اللى لازم أوصلها نصيحة فى ودن كل شاب معارض متموتش عشان حد ميسواش عايش فى أوهام الزعامة وعاوز يعوض سنين
شبابه اللى راحت فى النضال زمان قبل ما يعتزل النضال.. إوعى تموت عشان واحد قاعد
فى التكييف طول عمره وميعرفش معنى تراب الشوارع لما يثور فى معركة بين ولاد بلد
واحدة والدم مغرق الأسفلت .. اوعى تموت عشان ناس سكتوا سنين آه ناضل عشان حياتك
وحياتهم تكون أحسن وانزل اهتف لكن متفتحش صدرك للرصاص .. متبيعش حياتك رخيصة عشان شعب رخيص ممكن يلعنك
بعد موتك ويقول بلطجى وراح وممكن بعد ما تموت عشان حريته تلاقيه رجع فى العبودية
تانى لنظام جديد .
ونصيحة فى
ودن كل شاب إخوانى أو سلفى .. إوعى تموت أو تقتل عشان واحد حقير شايف انه أذكى من
الناس وممكن ينصب عليهم باسم ربنا .. دقن الشيخ مش أكتر من شوية شعر إوعى تموت
عشانهم أو تقتل أخوك فداهم. الشيخ أو المرشد اللى يقولك اقتل يبقى ميعرفش ربنا ..
وانت نازل تقتل أو تتقتل عشان شوية كدابين قاعدن همه وولادهم فى الامان وبيقدموك
قربان على مدبح السلطة بكره يغوصوا فى دمك وهما فى الطريق للكرسى زى ما عملوا قبل
كده
وصيتى
الأخيرة لكل مصرى فى الظروف السودة اللى احنا فيها تتلخص فى كلمتين : الدم أسوأ
وسيلة فما بالك باللى شايفينه هدف؟
