الونس بالله
الونس بالله
الونس بالله فى قلبك
شىء ماهوش محتاج تقوله
ساعة تدبر ويَا آية
صوم نهار
قعدة قراية
احتفال ويا الملايكة تحضره
بسمة وردى بتترسم على وش طفل..
تنوره
كلمة حلوة فى اللسان بتعطره
الونس بالله فى قلبك
مش فى سيفك
والإيمان مش طلقة تطلع من سلاحك
ولا يدل عليه نزيفك
ربنا مقالش تقتل لاجل يرضى
ربنا الحقيقى قال
الحق والخير والجمال
وحرام لو انت ضربت طفل
أو فى يوم دهست وردة
قول لى شكله إيه إلهك
مكتئب عابس حزين؟
كاره الناس أجمعين؟
فارد سيوفه ع العباد
بيخوفوا بيه الولاد؟
ده اكيد إله إرم وعاد
أما الإله اللى اصطفى م الكون
رسوله
بيظلل الكل بسماه
ورزقه حتى للعصاه
ورحمته لكل البشر
مهما تقولوا
ليست هناك تعليقات:
إرسال تعليق