حالة عشق مع نفسى
فى حالة عشق مع نفسى
وروحى حضنانى بنشوة
وجاية من حزنى وأمسى
مهاجرة للفرح .. بقوة
كتبت ترنيمة لقلبى
وصليت مع الحب التراويح
وإيمانى أهو طفل بيحبى
مع إنه كان فى الأمس دبيح
مبقاش فى روحى مكان لجراح
كأنى وصلت للملكوت
كيان كنته نهيته وراح
يا محلى حياتى بعد الموت
اكتبنى يا سجل الأيام
مولود جديد وميلاد تانى
مخلوق بإيديه خلق نفسه
وجود فريد وملوش تانى
بأمرى ثورى يا ريح العمر
على كل من خالف أمرى
وكل من فات على دربى
مقالش سلام
وكل من خان الأحلام
أو كان فى يوم شوكة فى ضهرى
أنا النبية المدهشة
الكافرة بيك والمؤمنة باللى يليك
عمدنى ربى فى الأحزان
فى النكسة شلت صليبى سنين
ورجعت أكرز فى القطعان
يا أيها المؤمن بيهم
إكفر مرة
سافر بره
صدق مشاعرك
وجدانك مش هيخونك
أنا اللى ألحدت ف تأويل ملوش معنى
إبليس فى عقلى مهوش كافر
لكنه جريء ومتمرد على الخيبة
الحب خطيئة؟ لا أبدا
رفض انحناك مهوش عيبة
لأنه خلقك على رجلين ارفع راسك
واللى استفزك باسم الدين
تحت مداسك
وطنك جواك
جيشك عقلك وإياك تصدقهم تانى
لو قالوا احذر من ناسك
علشان أعداء
أو خوفوك
من صوت جواك وقالوا وباء
رسالتى وصلت بالتأكيد
صدق أو اكفر مش فارقة
لأنى مش فارقة معايا
وانا فى الملكوت
فاهمة وراضية
عايشة وعاشقة
متمردة وبعلو الصوت
على كل رسالة من قبلى ومن بعدى
وكل رسول مبلغش اللى كان جواه
وكل زعيم معداش المحيط وطواه
والمستحيل آمنت بيه
وكفرت باللى ما عداه
ليست هناك تعليقات:
إرسال تعليق