اللهم إنى قد تمردت
المتمردة / ميادة مدحت
توقيعى على
استمارة سحب الثقة من محمد مرسى ( تمرد) مكانش كفاية أبدا انى أحس براحة الضمير
رغم انى مكونتش من اللى وثقوا فيه أصلا ورغم منطقية السؤال : هنسحب الثقة منه
وبعدين؟ لكن كان لازم أشارك فى الحملة حتى لو شفت ان الطريق بعد كده لسه مش واضح
وإن وضع المعارضة مش بس زى زمان لكن أسوأ لكن كان فيه سببين للمشاركة أولا شخصى :
انى مينفعش اسكت واقعد كده من غير ما اعمل أى مجهود لتغيير الواقع حتى لو مجهودى
ده مش هيغير كتير لكنه هيغير جوايا وجوه غيرى حاجات وثانيا : إنى فرحت انه
المعارضة أخيرا بدأت تاخد أشكال مختلفة أكتر من النزول للشارع والتظاهر وخلاص . المهم
امبارح طلعت من الشغل الساعة 5 وقلت اطلع على الهرم أقابل المجموعة اللى هنزل
معاها. ع الدائرى بقى ألاقى عربية B.M.W أحدث موديل فيها واحد من نجوم
الثورة – والله لغاية امبارح كنت فاكرة انه الموضوع ده إشاعة لغاية ما شفت بعينى –
المهم الجدع ده قبل التنحى كتب على الفيس عنده أنا شايف ن كفاية كده احنا عملنا
اللى علينا وغيرنا الحكومة نروح بقى وواحدة من الناشطات راكبة عربية حمراء حديثة
وده بيرن لها ودى تكنسل تقريبا كانوا طالعين على مدينة الانتاج أو مؤتمر سياسى 5
نجوم .. بصيت لزميلتى وقلت لها شفتى شباب الثورة إعلاميًا فى عربيات آخر موديل
ورايقين والحقيقيين لابسين الحتة الزفرة وطالع عينهم فى الشغل ومع ذلك نازلين يلفوا على
رجلهم عشان يوزعوا استمارات تمرد .
المهم وصلت الهرم
واتقابلت مع أجدع شباب مينا وايرينى و سلمى
وأمنية وأحمد وزكى وبدأنا من الطالبية هرم
فى البداية احنا كنا متوجسين شوية وبعدين بدأنا انا وايرينى من محل جواهرجى (مسلم)
وفوجئنا باستقباله وترحابه أهلا يا بنات يا مرحب وراح ماضى الاستمارة واتصل على
مراته تمليه الرقم القومى بتاعه وبتاعها وعملنالها استمارة هى كمان .. وبعدين
دخلنا على محل جمبه فالراجل قال لنا : والله العظيم انا قرفان وزهقان من مرسى
وجماعته بس قولولى هنمشيه ونجيب مين ؟ انا كنت مع الثورة وفرحت لما مبارك مشى بس
خايف نمشى مرسى ييجى الأسوا نبقى معملناش حاجة
.. زمان كنت باقاوح لما حد يقوللى نجيب مين وكنت أرد اننا احنا اللى بنصنع
البديل تمام زى ما بنصنع الديكتاتور لكن دلوقتى مقدرتش اقاوح الرجل وجهة نظره
منطقية وسؤاله منطقى ولو جاوبت او قاوحت ابقى باكدب عليه لانى عارفة كويس أوى أن
المعارضة عمالة تلعب فى منطقة الاحتجاج وبس ولغاية النهاردة لا فيه شخصية جاهزة
وعليها شبه اجماع وعندها رؤية ولا فيه حزب او تيار منظم وعنده برنامج احنا أقصى
حلمنا نطور أسايب الاحتجاج مش نبدا فى صناعة البديل الحقيقى .. لكن حتى لو الكفر
كان الخيار الوحيد باختار اضعف الايمان ولأن اليأس خيانة قررت أكمل فى أضعف
الإيمان ولما كملت ربنا ادانى اليقين فى وشوش عمرى ما هنساها وشوش صابحة زى العيش البلدى السخن طالع بنار الفرن ...وشوش
حلوة وقريبة تحس انك انت اللى راسمها من
كتر ما هى منك ... مش قادرة انسى طقم قهوة السيد عوف كلهم نفر نفر اللى حلوا علينا
لازم نقعد وقعدونى انا وزمايلى وجابولنا الناس لحد عندنا عشان يوقعوا الاستمارة ..
ومش هاقدر انسى الست المسيحية العجوزة اللى رفضت توقع على الاستمارة ولما اتناقشت
معاها فكرتنى بناطورى كارتا والصوفية اللى بشوفوا ان كل اللى بيحص ارادة ربنا ولما
ربنا يريد الخلاص هنخلص .. يا ستى يرضيكى يهديكى لا يغير الله ما بقوم حتى يغيروا
ما بأنفسهم .. صدقينى يا أمى مش هيطلعوا الا بإيدينا تقوللى يا بنتى ربنا اللى
هيخلصنا ولا امضا ولا بتاع طبطبت عليها ومشيت . ولا الست المخمرة اللى مضت وراحت
مضت ناس تانية وجابت الاستمارات.. أطرف
موقف بقى لما لقيت واحد شكله مريب عمال يطل انى اروح معاه عشان امضى المحل عنده
لان كلهم ضد الاخوان ورغم اتفاقنا اننا منسيبش بعض لكن قدام الحاحه قلت له بينا
على المحل رحت المسمط وفى دخلتى عرفت الفولة البهوات اخوان وفى ربع دقيقة كنت
لوحدى وحواليا ييجى 7 خرفان معتبرين على كلمة واحدة :
-
ماااااء انتوا مين ؟ مااااااااااء بتعملوا
ايه وعاوزين ايه ومش عاجبكم الاخوان ليه ... شوية لقيت الوضع بقى مريب وخطر وحسيت
بالغدر فى عينهم قمت رايحة ناحية الباب وشاتمة ومشيت ..بمعنى أدق ديلى فى سنانى
ويا فكيك اه الجرى نص الجدعنه فى مثل هذه الحالات J .
شوية ودخلنا حارة جانبية عدى جزء منا بسلام وشوية وسمعنا
هيصة وراجل عمال يشتم بأحط الألفاظ واطلعوا بره يا ولاد الـ........ هاكسركم
هادبحكم الاخوان اسيادكم يا كلااااااااب روحوا للى مشغلينكم يا..........وواحد تانى
بدقن قابلنا فى شارع قبلها قال نفس الكلام مش فاهمة فيه ايه .. المهم دخلنا على
شارع تانى لقينا الشارع كله اتلم علينا ورلقنا ولد على موتوسيكل فكرنا بمتوسيكلات
محمد محمود اللى كانت بتنقل المصابين الولد عمل حاجة غريبة جدا كان بيروح
بالموتوسيكل يجيب ناس تمضى ويرجعهم ويجيب غيرهم – متطوعًا- المهم واحنا واقفين راح
جاى واحد بصوت عالى بيقول – ماله مرسى ده مرسى زى الفل .. مكملش الجملة وراح النور
قاطع فى الشارع كله ع الضحك اللى فرقع فى الشارع وم البلكونات والشبابيك .. نحس
نحس يعنى.
كذا حد فى الطريق كان بيجرى يسلم علينا ويمضى الورق
ويقول انتوا فين ده احنا بندور عليكم ؟ كذا حد كان يطلب استمارة عشان يصورها ويمضى
ناس عليها .. كذا قهوة ومحل قعدونا نرتاح واتطوعوا بمكانهم كمقر مؤقت لدقايق لحملة
تمرد اتنين ستات شايلين عيالهم .. شغيلة وصنايعية .. أفندية متعلمين وببدل ..
عواجيز وصغيرين .. طلاب جامعة ..الناس تعبانة ومحتقنة وخانقها الغلب والغضب ..
الناس لسه حاسين بالظلم ولسه بيتعلقوا فى قشه .. الناس لسه قادرين يثوروا ويتمردوا
ولو بتوقيع على ورقة .. واللى فى القصر البعيد العالى لساه ظالم وغبى .. لساه أطرش
وأعمى .. واحنا – شباب الثورة اللى بجد- لسه مبعناش القضية ومركبناش البى ام ولا
طلعنا فى الفضائيات ولا حد سمع عنا ولسه بنحلم ببكره أحلى وبوطن يبقى بتاعنا وملكنا
بجد .
https://www.facebook.com/Tmrood
ليست هناك تعليقات:
إرسال تعليق